Ustavo vaš romologikane džanibena
O Ustavos pal romologikane džanibena hin kajso rodlo učeškolakero buťakero than, savo perel ke Fakulta socijalno džanibenengeri the sasťarďipeneskeri andre Univerzita le Konštantinoskeri Filozofoskeri Nitrate. O ustavos sas thodo andro berš 1990 sar e Katedra pal e romaňi kultura. E katedra sas thoďi, kaj te kisitinel le pedagogen, so sikhavena le romane čhaven. Jekhetanes la Pedagogicka fakultaha kerde študijno programos Učiteľstvo vaš o angluno grados perdal bazutna školi la romaňa kulturaha. Sa ustavoskeri egzistencia hin phandľi oleha, hoj kampel andre praksa ajse kvalifikimen manušen, so džanen sar te kerel buťi maškar o romane komuniti. O Ustavos pal o romologikane džanibena anglunes kamel te sikhľarel manušen, so kamen te kerel sar profesionala the profesionalki andre ajsi buťi, paš savi kampel te del vast le manušenge. Akana sikhavel le odborňiken perdal e socijalno sfera, beršestar 2011 šaj odoj džene sikhľon študijno programos Socijalna solgalipena the goďa. Jekhbareder dikhiben den la špecializacijake, so kale buťakerethanestar kerel angluno pal o sikhaviben sar te del vast le čore romane komunitenge, the andre romologikaňi sfera pre sa Slovačiko (romaňi čhib the kultura, romaňi historia) u the pal o sikhaviben ke etnikaňi tolerancija. Savoro, so o Ustavos pal romologikane džanibena kerel, džal avri duj bazutnone pilierendar u oda hin pedagogiciko buťi the džanlikaňi buťi. Pašoda perdal o džene, so odoj keren buťi, hin phandlo le nathemutne organizacijenca the kerel buťi jekhetanes vajkeci organizacijenca the ištitucijenca, so hine pro kheratuno, lokalno, themeskero the lumakero levelis. Buter informacii pal o Ustavos pal romologikane džanibena rakhena adaj: http://urs.web2v.ukf.sk/
Študijno koter Socijalna solgalipena the goďa
Džal pal o moderno, originalno, študijno programos, savo andre peskera parsuna na rakhena pre ňisavi aver uči škola pre Slovačiko u savo del le študentenge šajipen te kerel buťi andre socijalno ažutišagos the socijalna solgalipena (socijalna khera vaš vajkeci aversave grupi, phenas phure manuša, daja le čhavenca, famiľiji, čore u socijalno ekskludimen komuiniti, terne manuša the mek aver). Fundamentoske ole sikhľuvibnaske andre soduj leskere levela (bakalarsko, magistersko) hine predmeti, so hine phandle le neve goďipenenca andal socijalno ažutipen u socijalno solgaľipen, o sikhľuviben hino ačhado pal o predmeti: bazutňi pedagogika, psichologija, socijologija, socijalno politika the mek aver. Jekh sikhľuvibnaskero koter hin the o predmeti pal o Roma, romaňi čhib the literatura, romaňi kultura the historia.