O romologikane diskurza RODI2018 (Vakeras pal o Roma)
O angluno konferencijakero berš – Romologikane diskurza RODI2018 (Vakeras pal o Roma)
sas 15. novembriste 2018 andro Poradensko the servisno centrum perdal Univerzita le
Koštantinoskeri Filozofoskeri u opretele 60 gaďavera murša the džuvľa akademikaňi the
džanlikaňi komunitatar, themeskere inštutucijendar, maškarutne školendar the nathemeskere
organizacijendar pal sa Slovačiko vakerenas jekhetanes pal e romaňi čhib the kultura. Pre
konferencija sas aktivno the e Mária Patakyová, savoredženengeri arakhibnaskeri perdal o
hakaja, o Peter Krajňák, themeskero tajomňikos andal o Ministerstvo perdal edukacija,
džanibena, rodľipena the športos, o László Bukovszky, rajipeneskero splnomocnencos perdal
o nacijakere cikňibena the o Norbert Molnár, šeralo andal o Fondos perdal o nacijakere
cikňibena.
O konferencijakero programos sas ulado andro duj kotora, anglodilos kerenas prezentaciji, o
vičinde džene u palodilos savore denas duma andre trin sekciji: Ačhiben the arakhiben pal
romaňi kultura – kampľipena the limiti (moderinenas: e Zuzana Kumanová, e Ivana
Šusterová); Akanakere phučipena pal romaňi čhib – perspektivi, šajipena, limiti
(moderinenas: o Milan Samko, e Martina Horňáková); Tematika romaňa kulturaha andro
socijalna solgalipena (moderinenas: e Jurina Rusnáková, o Ivan Rác).
E konferencija sas kerďi le lovenca andal o Fondos perdal nacijakere cikňibena.
„Akala ďiveseste hin sadženengero the džanlikano vakeriben pal o Roma phandlo maj ča
socialne phučipenenca. Čoripen the socijalna gorederipena, ande save pele jekhbuter Roma,
hin bizo prioritno tema, aľe varesar amen pašoda bisterďam pal Romengeri nacijakeri
minoritakeri dimenzija. O ačhiben the arakhiben pal minoritakeri kultura the čhib hin
importantno u džal jekhetanes the le thaneha, savo la minorita andro them hin. Kisitimen
konferencija kerela than perdal e diskusija pal ala temi u paťav, hoj ada berš thovaha
tradicija perdal aver ajse tematicko orijentimen konferenciji“ phenďa e šeraľi andal o
Ustavos pal romologikane džanibena, e Jurina Rusnáková.
Šerale vakeribena:
PhDr. Anna Rácová, PhD.: Pal e vitalita the sar našľol e romaňi čhib pal e SlovačikoPhDr. Milan Samko, PhD.: Romaňi čhib andro kontekstos la čhibakera situacijaha the perspektivaha pre Slovačiko
PhDr. Arne Mann, CSc.: Goďipen pal e romaňi kultura
Prof. PhDr. René Lužica, ArtD.: Sar pes thoďas angluňi generacija romaňa inteligencijatar pal o arakhiben pal e romaňi čhib ando socijalisticko vacht
Mgr. Zuzana Kumanová, PhD.: Ačhiben pal romaňi kultura the nacijonalno ačhavipen perdal nacijakere cikňibenengeri kultura.
Doc. PaedDr. PhDr. Lýdia Lehoczká, PhD.: Malaďipena maškar e romaňi kultura the socijalna solgalipena